Langsam aber sicher bini mi wieder am iläbe dehiime. Giischtig hangeni zwar irgendwie no irgendwo am Äquator ume, aber das chunt de i de nächschte paar Täg sicher o no. Bi jetz drmit beschäftigt mit i d WG Zügle.
I wetti all dene Danke wo mi Blog gläse hi. So a de Reaktione vo de Läser hets sechs gloht es paar Stunde z investiere. O Danke wetti für all die Kommentär. Mengisch giistriichi u mengisch e chli weniger. I wetti hie niemer nametlich erwähne…
Nach em ne 8 stündige rächt agnähme Flug mit em A380 vo Sydney uf Singapore giits jetz de witer uf Züri. Bi sogar no uf em ne Rundgang düre Flüger gsi. Gseht rächt nobel us ir türschte Katergorie. I guet 12h landeni de z Züri. Juhuuu! Göne mer jetz no dr iint oder ander Schluk rote dasi imel de chli cha schlafe.
Sisch scho rächt nobel hie. Aber ehrlig gsiit ha mer e chli meh vorgstellt. Sisch halt ¨nume¨ 4 Stärn ;-). NI bi gwüss ganz z fride u wirde sicher guet schlafe. Mal niemer wo bsoffe mitz ir Nacht hiim chunnt u ki Wecker wo am 7ni abgiit vo irgendwelche Deppe wo net wüsse wo si ne versteckt hii. Die wo o scho i Backpacker übernachtet hii wüsse vo was dasi redä.
Morn am Nami giits de mit em A 380 uf Singapore. Und denn bini ja scho gli wieder ir Schwiz. S het mer gfalle hie aber chume doch o gärn wieder Hiim.
Di letschte 2 Täg bini dr Grosstad entfloh und uf Katoomba i de Blue Mountains. Das si 2h Zug fahre 1 Wäg für 12 $ (Gruess a d SBB). Dert bini Geschter chli ga Wandere. Hüt hani igentlich o no welle ga has du aber wägem strömende Räge la si. Morn isch no dr letscht ganz Tag z Sydney. Fröie mi scho uf ds ichecke im 4 Stärn Hotel mit em Rucksack.
3 Sisters
Schön!
750m obsig und z Miischte si Stägetritt gsi. Jeeehaaa!
Am Samschti abe mit em Flugi z Sydney acho. Geschter hanis de net chönne la si und ha wieder es AFL Game müese ga luege. Isch net so nes Hammerspil gsi wie z andere z Melbourne aber bi glich Fan vo dere Sportart. D Sydney Swans hii mit 123:68 gäge Port Adelaide Power gwunne. Swans was für ne Name für nes Footballteam. Fasch so schwuul wie Young Boys . Hüt hani e Usflug mit der Fähre nach Manly gmacht. Dert isch iine vo de bekanntischte Statdstränd vo Sydney, dä isch aber gsperrt gsi. Aber jä nu. Sisch eh fasch z chüel zum Bade mit so um di 20 Grad. Süsch bini ir Stadt am umewatschle und die verschidene Sehenswürdigkiite am gschoue.
Morn Macheni e 2 tägige Usflug i d Blue Mountains. Dert gani chli ga wandere. När chumeni wieder zrügg uf Sydney. Für di letschi Nacht hani mer de no es 4 Stärn Hotel buechet. Ha e Tip übercho für ne Internetsite wo me so Spetzialagebot überchunt. Quality Cambridge Hotel Sydney, luxury ****. Tönt doch net schlächt? Jetz zahleni für nes Zimmer 90$ anstatt 360$! Isch zwar immer no tür und unnötig aber so nach 4 Mönet Zälte und übernachte i zum Tiil wüeschte Backpacker giit das scho.
Da won jetz übernachte zahleni 22$ pro Nacht für ne 10er Dorm. Isch net grad schön aber s isch no es luschtigi Zimmer und isch rächt Inernational. Die Länder si verträte: Israel, Frankrich, Kanada, Kolumbie, Argentinie, Belgie und Schwiz! Ja richtig kört s het Mal kiner Dütsche i mim Umfäld! Di hii mi schüsch verfolgt i de letsche Mönet.
So hüt (Samschti) giits mit em Flüger ab uf Sydney. Das chunt mi zwar e chli türer als mit em Bus aber derfür giits nume 1:20 anstatt 13 Stund.
Geschter bini no ga Haar schäre. Also dä wo mier d Haar gschnitte het isch 100 % schwuul gsi! Är het mer du när o no so irgende e Paste i d Haar gstriiche u gmiit es gsengi ¨beautiful¨ us. Na ja är mueses ja wüsse Bi du när ga dusche für di Schiwachs ähnlechi Substanz wider drus z bringe.
Am Abe bini de es AFL spil ga luege. AFL hiist Australian Football League het aber mit em ¨normale¨ Fuessball für ¨Softies¨ net vil z tüe. Sisch so ne mischig zwüsche Rugby, American Football und Fuessball aber giiit brav zur Sach. Z Stadion isch mit 44 620 Fans guet gfüllt gsi. D Schlussresultat isch 116:114 für d Geelong Cats gsi. Ir letsche Minute hii d Western Bulldogs no so öppis ähnlechs wie ne Penalty im Fuessball vergä. D Zueschouer si for allem gäge Schluss rächt abgange. Und es wird o z Australie gärn, usgibig, lut und mit vilne f* Wörter übere Schiri gfluechet.
Etihad Stadium
Ir Mitti gits 6 Pünkt rächts u links 1ne (so wieni das begriffe ha)
Nach däm i Adelaide z Fuess erkundet ha, bini de no uf ne Wytour i z Barossa Valley. Da bisch vo Wychäller zu Wychäller und hesch überall Wy degustiert. So richtig e guete Wy woni hätti müesse chuufe isch aber net derbi gsi. Ussert so ne süesse Dessertwy mit 16 % het mi net schlächt dünkt. Het aber fsch wi z Coopsirup gschmeckt u weri drum gfährlich für mi. Z Beschte isch fasch z Mittagässe gsi. Känguru hets gä. Derzu hani mi mit zwe Canadier unterhalte wo z hie uf ¨Gschäftsriis¨ si. Di hii mi de o promt zum ne Bier iglade. Aber das vermöge si gluubs scho we me im Hilton übernachtet. Bi dene het öppe z Trinkgäld meh usgmacht als bi mier e Übernachtig.
Jetz bini Z Melbourne. Di Stad gfallt mer scho besser als Adelaide. O weni immer no net e Fan vo Stedt bi. Da häre cho bini mit em ne Nachtbus. 11h und dervo hani öppe 2 chönne schlafe. So hani e Übernachtig gsparrt und es isch billiger gsi als Flüge. Derfür bini jetz ufem Hund. Mues mer de das no Mal überlege wini de vo hie uf Sydney wott. Öbs ächt net doch gschider wär es paar $ meh uszgäh derfür isch meh ender dert. Ab Morn (Zischti) bini uf ere 3 Tagestour uf der Great Ocean Road vo mi wieder zrügg uf Melbourne bringt.
Bi grad e chli Fan worde vor Wüeschti i de letschte Täg!
Mir si nume 8 gsi im Bus a statt 21 we usbuechet isch. Das isch gäbig gsi de hesch d Schiiche o Mal chönne Strecke. Das isch o nötig gsi. Z lengschte isch 11h und 900km gsi a iim Tag! Insgesamt sis über 2000km gsi.
Z iinzig negative isch gsi das vo 8, 5 si Dütschi gsi. So bini um z ¨Hauchdütsch¨ rede net drum um cho. Sisch aber glich luschtig gsi und vor allem der Tourguide isch zum schiesse gsi. Mir hii me o ¨french tourist¨ gsiit will er würkli usgseh het wie dr gröscht Tourist. Und über Australischi Trinkspili wiis i jetz o chli meh… Mir hii gluubs aller e chli Muskelkater vom Lache.
Z übernachte im Swag (So ne übergrosse Schlafsack wo de mit dim Schlafsack chasch drischlüfe) underem Stärnehimmel isch e herrligi Sach gsi. Me het aber wägem Vollmond net so vil Stärne gseh und am Morge isches so zwüsche 5 und 10 Grad gsi.
Nach däm mer de d s Gebiet ume Uluru verlaa hii, hii mer z Coober Pedy im ne unterirdische Hostel übernachtet. Die Stad gildt als Opalhuuptstad vor Wält. Si sälber o nach Opal ga sueche und hii sogar o gfunde. Rich wirde ni aber no net vo mim Fund.
Jetz bini z Adelaide und es isch richtigs Herbstwätter mit 16 Grad und Räge. Das isch scho chli wine Schlag i z Gsicht so vom Nüt i ne rise Stadt. Hüt hani mi Flug umbuechet. Am 30. Mai 08:00 betritteni wieder Schwizer Bode. Bis den gniesseni Zyt hie z Adelaide, z Melbourne und z Sydney no. Net das mer d Ferie verliidet wäre, aber irgendwie hanis doch langsam gseh mit Stedt aluege. I d Wüeschti und z Great Barrier Reef geni sofort no Mal.
Kings Canyon
Kings Cannyon e Stund speter
Tourguide ¨Levi¨ alias ¨french tourist¨
Kata Tjuta
Wieder mal e Sunnuntergang
Uluru (gseht im Fall in Würklechkiit schöner us als ufem Foto)
Wi i de guete alte Zyt nach Opal budle
Super Gruppefoto!
Pose uf em ¨Devils Peak¨ (Vore giits gueti 50m z Loch ab)
So jetz hani mi Tour buechet. Sisch du schlussendliche e 5 Nächte tour worde. Ha mi sit Geschter öppe 3 Mal umentschide weli Art vo Tour dasi wott mache. Dä Trip woni mi du schlussendlech ehtschide ha isch vo Alice Springs us und giit über Kings Canyon, Uluru, Kata Tjuta, Coober Pedy uf Adelaide. Für alle die wo di Näme gar nüt säg chonne bi mim guete Kolleg am Mr. Google ga nachefrage. D weniger närveufribenderi Alternative isch es paar Täg warte und när miner Föteli ufem Blog aluege. Übernachte tuen me zum Tiil im Schlafsack under em Stärnehimmel und in Coober Pedy unterirdisch.
Mi Planig isch wieder mal ufgange! Mir wäri wahrschindlech lengwilig weni scho alls im Vorus buechet hetti. So ohni hie frage dert frage, vo Reisebüro zu Reisebüro ga inträsse hüchle us när glich net dert bueche… Drum wisi o no net so gnau weni hiim chume. Im Moment gsehts so zwüsche Afangs und Mitti Juni us. Ma kucken…
Geschter bini im Desert Park gsi. Das isch so ne Park wo aller di verschidene Pflanze u Tier wo ir Wüeschti drinne vorchöme. Ha zwar d Helfti scho wieder vergässe aber isch interessant gsi. Wenis no wüssti de wüssti jetz wo me nach Wasser müesti sueche. Tier hets Schlange, Kängurus, verschideni Müs und Rate Arte, Vögel, Chäfere und no vil meh ka. Z Beschte isch e Flugshow mit Jagdtvögel gsi.
Nach däm i düre Tag öppis ¨Intelektuells¨ gmacht ha, hani am Abe no öppis Kulinarisches gmacht. Kängurufilet mit Pfäffersoose. Mmmm isch guet gsi aber net z beschte Stück Fliisch woni je gässe ha. Trotzdäm isch jetz e witere Spezies vom Usstärbe bedroht : -)
Hüt am Morge luegeni mer z ¨Royal Flying Docter Service¨ Museum a. Das isch e Ustellig über wie das es hie mit em Dokter im Outback funktioniert. Am Mittag giits de los uf mi 6 Tägig Trip. Den köret der de es Zytli nümme vo mier
Blick vom Anzac Hill über Alice Springs
Desert Park
Dä Vogel isch iine vo de Inzigschte vo die Eier cha uftue. Är schiess derzue immer wieder e Stii uf d Schale. Gschids Fiich!
I wetti hie niemer nametlich erwähne…
